सरकारले फेर्यो तीन प्रदेश प्रमुख
सरकारले तीन वटा प्रदेशमा नयाँ प्रदेश प्रमुख पठाउने निर्णय गरेको छ।
सोमबार बसेको मन्त्रिपरिषद बैठकले प्रदेश नम्बर १ मा परशुराम खापुङ, कर्णालीमा तिलक परियार र सुदूरपश्चिम प्रदेशमा देवराज जोशीलाई प्रदेश प्रमुख बनाउने निर्णय भएको हो।
‘उहाँहरूलाई प्रदेश प्रमुख बनाउने निर्णय भएर पत्र राष्ट्रपति कार्यालयमा पठाइसकिएको छ,’ स्रोतले सेतोपाटीसँग भन्यो।
प्रदेश प्रमुखमा सत्तारूढ दलहरूले भागबन्डा गरेका छन्।
प्रदेश १ मा नेकपा (एकीकृत समाजवादी) का नेतासमेत रहेका पूर्वसभासद खापुङ प्रदेश प्रमुख भएका छन्।
साथै कर्णालीमा पहिले प्रदेश २ का प्रदेश प्रमुख भइसकेका परियारलाई नै जिम्मेवारी दिइएको छ। उनी नेकपा माओवादी केन्द्रनिकट हुन्।
यस्तै सुदूरपश्चिममा कांग्रेस नेता तथा पूर्वसभासद जोशी प्रदेश प्रमुख भएका छन्। उनी कांग्रेस बाजुराका पूर्वसभापति पनि हुन्। हालै उनी कांग्रेस महाधिवेशन प्रतिनिधि र महासमिति सदस्य पनि भएका थिए।
सेतोपाटीसँगको कुराकानीमा जोशीले सुदूरपश्चिम प्रदेशको प्रदेश प्रमुखमा आफू नियुक्त भएकोबारे जानकारी आएको बताए।
‘प्रदेश प्रमुख नियुक्त भएको खबर आएको छ। लिखित पत्र पाइसकेको छैन। आज काठमाडौं आउँदैछु,’ उनले भने।
नयाँ प्रदेश प्रमुखहरूलाई छिट्टै सपथग्रहण गराउने तयारी छ।
प्रदेश १ मा सोमनाथ अधिकारी प्यासी प्रदेश प्रमुख छन्। उनी नेकपा एमालेनिकट हुन्। सुदूरपश्चिम प्रदेशमा एमालेकै गंगाप्रसाद यादव प्रदेश प्रमुख थिए भने कर्णालीमा पनि एमालेनिकट गोविन्दप्रसाद कलौनी प्रदेश प्रमुख थिए।
तत्कालीन प्रधानमन्त्री केपी शर्मा ओलीका पालामा नियुक्त भएका प्रदेश प्रमुखलाई प्रधानमन्त्री शेरबहादुर देउवा नेतृत्वको सरकारले हटाएको छ।
यसअघि प्रदेश नम्बर २, बागमती, गण्डकी र लुम्बिनी प्रदेश प्रमुख पनि फेरिएका थिए। त्यसबेला पनि दलहरूले भागबन्डा गरी प्रदेश प्रमुख बनाएका थिए।
ताजा समाचार
