Oct 26, 2021

भीम रावललाई प्रधानमन्त्री ओलीको जवाफ- म कुन पार्टीको हो सर्वोच्च अदालतमा सोध्न जानू

Mar 08 , 2021

प्रधानमन्त्री केपी शर्मा ओलीले आफू नेपाल कम्युनिष्ट पार्टीको साधारण सदस्य पनि नरहेको बताएका छन्।

सोमबार काठमाडौंमा आयोजित एक कार्यक्रममा बोल्दै प्रधानमन्त्री ओलीले आफ्नो पार्टी कुन हो भन्ने कुरा सर्वोच्च अदालतको फैसलाले टुंगो लगाइदिएको बताए।

यसअघि आइतबारको प्रतिनिधि सभा बैठकमा बोल्दै सांसद भीम रावलले प्रधानमन्त्री ओलीको पार्टी कुन हो भनेर प्रश्न सोधेका थिए।

सोही प्रसंग उल्लेख गर्दै प्रधानमन्त्री ओलीले भने- मैले सोध्न नपरोस् तपाईं कुन पार्टीको हो? मलाई त उहाँहरूले नेकपाको साधारण सदस्यबाट पनि निष्कासन गर्नु भएको थियो। म नेकपाको साधारण सदस्य पनि होइन। अदालतले भन्यो म कुन पार्टीको सदस्य र अध्यक्ष हो।

उनले रावललाई लक्षित गर्दै भने- म कुन पार्टीको सदस्य हो भन्ने लाग्छ भने अदालतलाई सोध्नू।

प्रतिनिधि सभा बैठक स्थगित भएकोमा पनि प्रधानमन्त्री ओलीले कटाक्ष गरे।

‘मुद्दा मामिला गरेर संसद पुनर्स्थापना किन गर्‍या रैछ त भन्दा उफ्रिन नाराबाजी गर्ने रैछ,’ ओलीले भने,’कम्तिमा मेरो मेख मार्न भए पनि पहिलो बैठक राम्ररी चल्न दिनुपर्छ।’

उनले संसदमा यस्तै हुन्छ भनेर आफूले प्रतिनिधि सभा विघटन गरेको तर्क गरे।

‘दुर्दिन देख्नु रैछ, पुनर्स्थापना भयो। एक थरी नारा लगाउँछन्। अर्को थरी गुरूरू बाहिर निस्कन्छन् कहाँ जान हतार थियो कुन्नि!,’ प्रधानमन्त्री ओलीले भने,’संसदमा गज्जबको सेटिङ देखियो।’

उनले संसदमा पेस हुन लागेका अध्यादेशहरू सक्ने भए फेल गरेर देखाउन पनि चुनौती दिए।