Oct 25, 2021

दिल्लीलाई १३ रनले हराउँदै चेन्नई शीर्षस्थानमा उक्लियो

May 01 , 2018

पुछारमा रहेको दिल्ली डेयरडेभिल्सलाई १३ रनले हराउँदै चेन्नई सुपर किङ्स इन्डियन प्रिमियर लिग (आइपिएल) को शीर्षस्थानमा उक्लिएको छ।

२ सय १२ रनको विजय लक्ष्य पछ्याएको दिल्ली २० ओभरमा ५ विकेट गुमाउँदै १ सय ९८ रनमा समेटिएपछि चेन्नई शीर्ष स्थानमा उक्लिएको हो।

दिल्लीका ऋषभ पन्तले ७९ रन तथा विजय शंकरले नटआउट ५४ रन जोडे पनि टोलीलाई हारबाट जोगाउन सकेनन्।

ओपनर पृथ्वी शअ ९ रन जोड्दै पेभेलियन फर्केपछि कोलिन मुनरोले २६ रन जोडेका थिए। कप्तान श्रेयस ऐर १३ रनमा आउट भएका थिए।

दिल्लीलाई रोक्न चेन्नईका बलरले सम्हालिएको बलिङ गरे। उसका लागि केएम आसिफले २ तथा लुंगी एन्गीडी र रविन्द्र जडेजाले १-१ विकेट लिए।

यसअघि टस हारेर पहिले ब्याटिङ गरेको चेन्नईले शेन वाट्सनको अर्धशतक तथा अम्बाटी रायडु र कप्तान महेन्द्र सिंह धोनीको आक्रामक ब्याटिङपछि निर्धारित २० ओभरमा ४ विकेट गुमाएर २ सय ११ रन बनाएको थियो।

उसका लागि वाट्सन र फा डु प्लिसिसले पहिलो विकेटका लागि १ सय २ रन जोड्दै मजबुद सुरुवात दिलाएका थिए। वाट्सनले ४० बलमा ७ छक्का र ४ चौकाको मद्दतमा ७८ रन बनाएका थिए । डु प्लिसिसले ३३ बल खेल्दै ३ चौका र १ छक्कासहित ३३ रन जोडे ।

अघिल्लो खेलमा अर्धशतक बनाएका सुरेश रैना १ रनमै आउट भएपनि कप्तान धोनी र अम्बाटी रायडुले पारीलाई अघि बढाए। २२ बल खेलेका धोनीले ५ छक्का र २ चौकासहित ५१ रन जोडे। रायडुले ५ चौका र १ छक्का प्रहार गर्दै ४१ रन जोडे।

दिल्लीका लागि अमित मिश्रा, विजय सरकार र ग्लेन म्याक्सवेलले समान १-१ विकेट लिए।

गएरातिको नतिजासँगै ८ मध्ये ६ खेल जितेको चेन्नई १२ अंकसहित शीर्षस्थानमा छ। त्यत्तिनै खेलमा २ खेल मात्र जितेको दिल्ली ४ अंकसहित तालिकाको पुछारमा छ।

मंगलबार रोयल च्यालेन्जर्स बैंलोर र मुम्बई इन्डियन्स भिड्नेछन्।